Aquí encontrarás actividades que pueden usar en la clase de mapudungun.
Kuyfike mapuche yem chumngechi ñi admongefel engün.
Kiñe düngu pian:
Dew füchan iñche, doy pura mari tripantu nielu trokiwün. Fey tüfachi fentren ñi mongemun kimyepafiñ ñi chumkefel kuyfike che yem, kom ñi kakewme admongefel kimnieken; kümeke adngefuyngün, weshake ad ka ngefuyngün.
Itrokom tüfa nütramafiñ fewla: konümpayafiñ chumngechi ñi tremmum iñche ka chumngechi ñi mongefum füchake l’aku em.
Fewla kalewetuy mongen; tüfachi weche mütewe wingkatuyngün; allwe ngoymarpuyngün taiñ küpal ñi ngülam ka ñi düngu; kalli rupape kiñe mufü tripantu, feymew epe kimwerpulayay ñi mapu düngun engün.
Feymew, ¡düngulpe tüfachi lifro engün kiñeke nag rume!
Piken may ta tüfa.
Primera actividad.
Kuyfi ñi püchikael nütramkakefenew ñi ñuke yem. Wüne feypienew:
Tripawyey nafiw tüfachi Puawchu ñi playa mew. Feychi mu eymi kupülwe mew miyawüleyu yu pemefiel tüfachi nafiw; fey tripalu traforkey; “Joven Daniel” pingefuy.
Triparkey fey mew wera weshakelu: itrokom ropa, fentren rüngo trapilen; kom playa kelükefuy trapi mew; keyü pülku ngamchemchi kake weshakelu kay.
Ka triparkey kiñe ül’men wingka mongen, ka pu chiñura, mongen kiñeke, kakelu l’a, ka kiñe fücha trewa. Feychi trewa anüñmaniekefuy ñi ñidoltrewakeetew.
L’angümngey, piam, feychi kafalleru mew, l’angümeyew pu mapuche. Feychi chiñura, mongen tripayelu, yengey, piam, Forowe. Feymew wimpuy, yepatufeyew ñi pu mongeyeel, piam, pilay ñi amutual engün, mülekay pu mapuche mew.
Feychi nafiw mew tripalu wera weshakelu ngülümi pu longko, keyü kon’a tuy feychi kom weshakelu.
Mülefuy kiñe longko Malalwe, Kuriñ pingefuy, Pedro Payneñ ñi chaw em. Fey, piam, anümuwi kiñe lolo kura mew ina lil. Fey, piam, wiñamelngey tüfachi weshakelu, kom apolfi, piam, feychi lolo kura fentren kakewme weshakelu mew. Ka tüfachi kake mapuche ka fey fenten wiñami weshakelu, apoli, piam, ñi ruka yengün.
Tüfachi pülku pütufingün, fente ngollingün, piam, kiñeke l’ayeyngün trüfngollilu; fente kütral femngefuy ñi newenngen tüfachi pülku. Feymew l’ayelu engün, «pütuwelayafiyiñ feychi pülku», pingün kiñeke ñom «tüfa nierkey funapuwe», pikeyngün. Feymew wütrunentufingün, piam.
Feychi tripachi nafiw mew werinelngey pu longko. Feymew yengepay Kuriñ pingechi Pedro Payneñ ñi chaw em. Ka yengepay Werapill, mülelu Rawkenwe. Valdivia püle rulngemeyngu, fey tükungeyngu nafiw mew, nentungepuy Valparaiso engu. Feymew ka puwülngeyngu Santiago trokikelu mew.
Feychi mu mülefuy kiñe ñidol longko Kollil’ewfü mew, Wakiñpang pingefuy. Mütewe shakingefuy fillpüle tüfachi mapu mew; kom Troltren püle ka Forowe püle ngüneniefuy ñi pu longko.
Fey tüfachi Wakiñpang ngünayturkey tañi epu longko amulu Santiago. Fey inarkefi engu, puwi Santiago, düngupuy tüfachi Presidente.
«Inapan tañi epu longko; ¿chem werin kam niepeyngu?» pipufi.
Feymew may feypingefuy: «Eymün mün mapu mew inawtupuy kiñe nafiw; feymew kom nüfimün ñi weshakelu; feychi werin nieymün», pingey Wakiñpang.
Feymew, piam, feypi Wakiñpang longko: «Iñchiñ kam ¿chem mu werinngeafuiñ, iñchiñ kam ngünefiyiñ feychi l’afken’ ka feychi kürüf? Fey may entueyew tüfey ina playa mew; feymew trafoy. ¿Feymew kam iñchiñ chumiñ tüfey mew? Feley ñi nüngen feychi weshakelu, kom kam ngünampürayafulu pingey may, dewma n’ümüngey. Mütewe may rume werinngelaiñ iñchiñ. Fill inawtukan mülekelu, feymew may inawtuy feychi nafiw».
Feymew elungetuy ñi epu longko, wallngünaytungetuyngu.
Fey ka pingeyngün: «Fanten mew may ñi ngenoam wesha düngu eluwaiñ kiñe padre; yeyeafimün tüfachi padre. Nielmün pu fotüm kimelelngeaymün, papeltuayngün, itrokom kümeke düngu kimelngeayngün; eymün ka fey kimaymün. Feymew kümeleaymün, chem düngu rume ngelayay», pingerkeyngün.
Feymew feyenturkey feychi ñidol longko Wakiñpang. Dewma yemefilu ñi padre –P. Constancio pingefuy– fey ñidolpoyeniefuy ñi padre ngen’padre ngefuy. Femngechi anümpafi rulu mew, fewla Puerto Saavedra pingey feychi mapu.
Dewma mülepatulu engün rupan ngemewma Santiago püchin mew ka tripapay kiñe longko mülelu Paykawi, fül Cañete, Nekulpang Zuñiga pingefuy. Fentrengey, piam, akuy Bajo Imperial; feymew anümuwpay. Femlu mekepay, piam, ñi pleytun feychi nafiw mew tripachi weshakelu mew. Llükay, piam, pu longko, pleytungepayngün, wülyetuyngün, piam, feychi kom weshakelu ñi tuñmufel engün nafiw mew, keyü milla, plata, fey ka tripafuy nafiw mew. Kiñeke kon’a ngillarütrafuyngün feychi plata rütrafe mew, dewmafuy, piam, ispuela; fey ka kom wültuyngün.
Fitukullingenoli ñi trokiwün feychi longko Zuñiga ka kullingey, piam, waka ka manshun. Itrokom longko keyü kon’a trürümi, piam, tüfachi kulliñ. Feymew ngülümpay, piam, wera waka, tuntenchi, patakachi, kimfal‑lay, itrokom che kam kullilu. Ka iñche ñi chaw wüli, piam, kiñe manshun. Femngechi ngülümpalu ñi kulliñ, fey amutuy, piam, tüfachi longko, amutulu fey ngewelay düngu.
Feychi mu iñche püchikael kimlafuiñ tüfachi düngu. Ka ñi akun feychi P. Constancio ka kimlafuiñ, ngellu‑ngellu wüla kimrumen.
Kiñe nag nüchengeparken, fey lliwafiñ. Akuy wera che iñ wül’ngiñ ruka mew. Feymew iñche ñi ñuke metanenturukaenew wekun püle, yeniefenew kadil ruka mew. Feymew katrütungemey, lefentuñmangemey ñi püñeñ metanielu lipang mew. Femel iñche, fey wirarkawi ñi ngüman ñi ñuke yem, dew nentuñmael ñi püñeñ.
Kimlafiñ iñche chem düngu mu felechi tüfa.
Fey wüla yengepan wente kawellu. Kimlafiñ chew ñi rulngemefel, püchi lliwalan rume.
Ka antü anülerken rangi wera che kiñe lelfün mew. Feymew pepurkeenew ñi chaw em, yelürkeenew püchi mürke, fey ifun. Iñche ñi man püle anülerkey kiñe ñidol longko: fey tüfachi Wakiñpang em ürke.
Fey düngurkeyngün. Püchin mew wüla ngillatu-meturkeenew ñi chaw em, fey yemeturkeenew; welu iñche lliwalafiñ chew ñi rulpatufetewchi. Ka ñi akutun ruka mew ka ñi peputun ñi ñuke yem, ka fey kimlafiñ; mütewe püchi perkelafun, feymew lliwalan tüfachi düngu.
Feychi pu longko ñi nüchepaetew, kiñe Lefimañ pingefuy, kangelu Kallfümañ, kangelu Kayull; wera che ngülümürkeyngün ñi nüchemeaetew iñche engün; Kal’of, Katrümalal fey püle tuwchi pu longko engün tüfa.
Weñen‑düngu mew pingefuy ñi konümpangekefel, welu iñche kimlafiñ ñi chumletufel, turpu ngewerkelay tüfachi düngu, kimpüramen.
Dewma ñi kimpürameel pepafiñ kiñe trem che, fente kushengefuy, niepefuy doy pataka tripantu. Fenten ñi kushen angkürkefuy ñi kuralnge yem, ka niewelafuy foro, re ürüm müten ngefuy. Ka allküwelafuy, pilungewefuy; welu nütramkangey ina pilun’, fey müte küme nütramkakefuy. Feychi kushe Picholl pingefuy, iñche ñi furi rüngkoy yem. Wechuñpang pingerkefuy ñi füta yem, iñche ñi yom l’aku.
Feychi Wechuñpang nierkefuy fotüm, Ayllapang pingerkefuy, iñche ñi l’aku tüfa, kurengerkefuy, welu feychi kure, iñche ñi kuku, fey kimpalafiñ. Feychi Ayllapang ñi fotüm Tomás Koña pingefuy, iñche ñi chaw em tüfa, llegfuy tüfachi ina l’afken’ mew, Rawkenwe pingey tichi mapu.
Iñche ñi ñuke yem llegürkefuy Wapi, chew müley tüfachi kapilla fewla, Kolwe pingey feychi mapu; ñi chaw em Payllaw pingerkefuy. Fey tüfachi fücha wentru ñi chaw em ñi ñuke yem, ka iñche ñi cheche.
Ñi ñuke yem ñi ñuke, iñche ñi chuchu, Wenter pingerkefuy; mülerkefuy Mayay, chew müley fewla Marta, l’antu Püchipaynemill em ñi domo. Nierkefuy kiñe lamngen ürke Paynekew em, welu feychi ngen’ ñawe, iñche ñi yom cheche, kimpalafuiñ.
Feychi Payllaw ñi ñawe, tañi ñuke yem, Wenter ñi püñeñ, ngapitupey ñi chaw; «dewma niefilu mafün», pikelu kam. Femngechi niewfuyngu Rawkenwe pingechi mapu mew.
Ñi ñuke yem fente küdawfengefuy, chofüngelafuy; dewmakefuy, ngüpüñ makuñ, al’ün ngüpüñ kimniefuy. Ka küme piwke ngefuy, rükülngelafuy; mütewe ngünaytuchen ngefuy, illkunngelafuy, fente küme piwke ngefuy yem.
Ñi chaw em fey püchi illkunngefuy; kiñeke mu kewakefuy ñi kure, welu rupalu ñi lladkün kümel-kawkülekatukefuyngu. Fey kimpafiñ iñche ñi tremel.
Feychi mu kom che cristiano üyngelafuy. Feyengu ka felefuy, morolefuyngu. Welu ñi ñuke yem admarkefuy cristiano üy, feymew Juana pingefuy; ñi chaw em ka femngechi admarkefuy cristiano üy, feymew Tomás pingefuy.
Fey niewlu engu choyüyngu, fente yallingu; niey wentru yall engu ka domo yall.
Wüne yall‑lu engu, fey ta iñche. Ka inapay Felipe. Kiñewün tremiyu, welu ñi peñi konlay chem escuela mew no rume, feymew kimlay chillkatun.
Wüne kurengey, Panchilla pingefuy feychi domo. Feymew yalli, niefuy küla fotüm ka meli ñawe, welu ñi l’ayelmum kake yall püchikelu.
Tüfachi kiñe fotüm Segundo Koña wüne kasarafi inglesia mew Isafel Wenchulew; feymew wüla wedwedkechi adentufi kuyfike che yem ñi moro‑düngu, ngülümfi küla kake domo kure femngelu. Feychi Segundo müten mongelewey, kakelu l’ayngün.
Kiñe ñawe María Koña pingey, kangelu Karmelita. Fey mongeley Wapi mew; Domingo Payllañ pingefuy ñi füta yem, ürfilu l’ay wengen wüla. Ka epu ñawe mongeley; fey kimüñmalafiñ ñi üy, ka mapu müley.
Felipe l’antuy. Feymew niefuy ka kiñe domo; fey pülletu kishu l’angümuwi, allwe wedwedngefuy, ko mew ürfiluwpurkey. Fewla kiñelewey ñi peñi, dewmalkeeyew ñi iyal ñi l’aku, Daniel em (Felipe ñi fotüm) fey ñi ñawe tüfa, Klorinda Koña, pingey.
Kakelu inapalu, fey kimlafiñ ñi üyyengefel kam ñi üyyengenofel, fente püchikelu l’ayey, melichi, kechuchi, newe kimwelafiñ. Kakelu füchake tremfuy; feyengün küme kimpafiñ.
Wüne l’ay ñi lamngen em, María pingefuy. Niepefuy mari pura tripantu, kawchulekafuy; kimlafiñ ñi dewma cristianongefel kam ñi morolefel; l’ay colera kutran mew.
Ka lamngen Karmelita pingefuy, fütangefuy Mañiw püle; Kadiñ pingefuy feychi wentru niefeyew; fey wüdatuy wüla. Niefuy kiñe püñeñ, Zenón pingey, iñche ñi choküm, küme wentru ngefuy, welu fewla wünotuy, kiñe wesha mapuche ñi duam. Wüdatulu Karmelita, fey niefeyew Ingnacio Melillang, Kechukawiñ pingechi mapu mew; fey l’apuy, cristianongefuy.
Kangelu ka l’ay iñangemu, Fidel Koña pingefuy, mongelefuy Kallfükew, mapuche ad kurengefuy. Niefuy kiñe fotüm Domingo Koña; fey kamel l’ay allfen mew. Witrañpürampefilu kiñe kareta wechun mew, witrafi furitrekanlu. Feymew mütrorüy ka payl’anagi; feychi faral trañmaeyew wente pütra; feymew tuy ñi kutran. Mütrümelfiñ padre, konfesañmuwi ka kasarafi ñi domo ñi niefel. Feymew pülletu l’akay; küme weche ngefuy.
Ñi af lamngen Klorinda Koña pingey. Fey fütangefuy mapuche ad mew Juan Marifil engu Kudiko pingechi mapu mew. Niey kayu püñeñ tremlu, pu n’an’üng ka pu llalla ka al’üke pu chuchu engu kuku. L’alu ñi piñom welunieyew Waykill Flanku. Chumül allfülewey kiñe ngollin wesha wingka ñi kawell mew, feymew kasay padre mew. Llafi wüla.
Fewla iñ külangen mew mongeleiñ: Iñche Paskual Koña, ñi inan peñi Felipe Koña ka ñi af lamngen Klorinda Koña.
Dewma kimrakiduamlu mongelerkefun ñi chaw em ñi ñuke yem engu tüfachi ina l’afken’ mew, Rawkenwe pingey tichi mapu. Feymew tremün.
Nierkefuy ñi chaw kiñe fücha welta manshana; fill manshana mülefuy ka mütewe fün’kefuy. Amukefuiñ iñ püchichengen tüfachi welta manshana mew. Iñ yemeal kochi manshanas ngüneltuyawkefuiñ feychi aliwen manshanas. Feymew iñ ayüñmafiel ñi fün’ngen mew ka ñi chodün mew dewma, re mütrükefuiñ mamüll mew. Kiñeke mew kamputukefuiñ püchike mamüll mew, kangen mew winolütupürakefuiñ feychi aliwen. «Doy nagay» iñ pifiel ngeykukefuiñ feychi fünngechi chang. Feymew fulfulikefuy ñi nagün tüfachi manshanas ka üngarkütuyekefiyiñ iñ ifiel.
Ka awarkudekefuiñ. Feymew ngülümngekefuy pura awar, chafngekefuy kiñepüle ange mew ka kuyul’ mew kurükünoyeñmangekefuy ñi chafngemum engün. Dew felelu ka ngülümngekefuy epu mari kow: küllwi, ka alfid, ka awar, ka püchike mamüll, kiñelketu.
Dewma kudealu elngekefuy kiñe ültu‑ngütantu pülli mew. Fey wüla anüy feychi epu weche lügalu, puñmawingu; kiñeke niey ñi epu mari kow kiñepüle afkadi mew. Femlu engu «kudeayu may» piwingu.
«¿Chem pilelaen?» pifi ñi kayñe feychi kiñengelu.
«Tüfachi lashu ranelayu. Eymi ka, ¿chem pilelaen?»
«Tüfachi lama, kuchillo rume, tuchingenke ayülmi, ranelayu», pi.
«Lama ayün».
«Kümey».
Fey koni ñi kuden engu. Feychi pura dewman awar‑kudewe pingey. Fey tuy kiñengelu, wüne man küwü mew trunafi, patrünakümfi wüla wente ngütantu.
Tüfachi awar kudewe meli payl’anaglu, fey “paro” pingey; fali kiñe kow.
Welu feychi pura awar kom payl’anaglu, kom lüpünaglu rume, fey “kurü”, “lig” rume, pingey; fali epu kow.
Tulu paro rulpay ñi kiñe kow ñi kañpüle lipang mew; kurü kay tulu lig rume, fey epu rulpay ñi kow kañpüle afkadi mew chew ñi rulpamum feychi wünetu.
Tunielu paro, kurü rume, fey afel‑lay ñi ütrüfnien. Dewma tunolu kurü, paro rume, fey ütrüfwelay, fey koni ñi kayñe; fey ka femngechi kudekey.
Feychi kudekelu petu ütrüflu ñi kudewe engu, ülkantulkefi: «¡Amuyu kudewe!; ¡fürenean kudewe!; ¡kurü mew amuayu kudewe!», pikey ñi ül engu.
Femngechi kudelekey feychi epu kayñe. Tuchi wüne apümlu ñi kow ñi rulpanien kañpüle lipang, fey wewkey. Welu petu llowlay ñi wewaelchi ran; rangiñkey müten kuden, epu nag femngekey.
Feymew ka yechiltukeyngu, ka femngechi amuley ñi kuden. Ka wüne apümkalu ñi kow feychi wünetu apümuwma fey wüla afi kuden; welu traftungelu aflay, müley ñi inakudeal engu.
Tuchi inaw‑inaw apümlu epu nag ñi kow, fey küme wewkey, fey nükey ñi ran.
Kuyfi “lügün” pingekefuy tüfachi awarkudeken.
Kiñeke mu piwchillkantukefuiñ. Iñ awkantuael mew amukefuiñ lelfün mew chew ellolechi fücha row mawida mew.
Feymew ütrüfrumekefuiñ kiñe lashu. Küllwadülu dewma, fey chagüñmakefuiñ ñi epu wechun fey pürokünukefuiñ. Felelu ñi pürolen, elelkefuiñ püchike takun, iñ anüam feychi wente püron lashu mew.
Feymew anüel piwchillkantualu püchi wingkulkülechi mapu mew eluwmey al’üpu, küme tuniewi epuñpüle nütrüngkülechi lashu mew; fey witrañpürami ñi epu n’amun’ ka müchay müten piwchillkantuy.
Kangen mew notukalefkefuiñ; kuyfi iñ püchike chengeel rumenka awkantuniefuiñ.
Feymew epu püchike che lefalu kiñewün künuwkeyngu. Fey wüla «¡ya!» pikeyngu. Fey amukey ñi lefün engu. Feychi doy leflu wüne tripapukey chew ñi tripapuam. Fey «¡weweyu!» pikefuy; iñange tripapulu wewngekefuy.
Ka kiñeke nag palikefuiñ. Trawukefuiñ mari püchike che, kom kishuke niekefuy ñi wüño, küme trüfülkülelu ñido mew. «Paliaiñ may», piwkefuiñ.
Feymew wüne adkünongey paliwe, küme liftungekey. Fey wüla wiringekey epuñpüle wif, trürngey ñi fentenün, katrülwe pingey tüfa, lashu mew küme norümngekey feychi katrülwe.
Feychi epuñpüle wechun katrülwe mew dewmangekey ka seña: katrüntükupüllingekey chew ñi tripapuam feychi pali; tripalwe pingey tüfachi epu longko paliwe. Feychi katrülwe ñi epuñpüle wif doy füchakünongey, tripalwe doy püchi rupay.
Epuñpüle tripalwe mew elngekey püchike rewe. Paliwe ñi rangiñ mew künungekey püchi lolo, shüngüllwe pingey.
Kom pepikawel kishuke kintukey ñi konyewalu; femngechi kechu konwen müleweiñ; kayñewen pingey kay.
«Iñchiw konuwayu», piwkeyngu. «Ya may», pi kangelu, «tüfachi pañu ranelayu». «Iñche kay tüfachi witruwe», pi kangelu.
Ka femngechi feypiwkey feychi kechu konwen.
Feymew wüla feypikey feychi kiñe kelluwen: «Iñchiñ fapüle entuaiñ».
«Kümey may», pi kangelu ingkawen, «iñchiñ fapüle», wichuke dullikey ñi tripalwe, chewpüle nentual ñi pali engün.
Kom trürlu ñi felen engün fey konkey kiñe konwen shüngüllafilu feychi pali shüngüllwe mew mülelu. Feychi epu shüngüllfe ñidolngeyngu kom paliñ mew. Feyengu tükulelfi ñi wüño, rangiñmangey pali wüño mew, küfinentual pali chew ñi tripayam. Tuchipüle tripalu nükeeyew feychi kake pu konwen afkadingelu shüngüllfe mew. Fey mekekey ñi palifiel engün; kiñe kelluwen rütrekey pali ñi tripalwe püle, kangelu ingkawen katrütupalikey.
Femngechi palitulu engün tripachi pali kiñepüle tripalwe mew, fey «kiñeliyiñ», pikey feychi ingkawen entuyelu. Fey ka koni ñi shüngüllngen pali. Welu fewla kañpüle kayñewen tripakalu pali, feymew traftuwingün; ñamtuy wüne tripalu; ngelay kuden. Ka koni. Furi katrülwe tripalu pali, fey falilay; «katrüy» pingey.
Femngechi afkentu mekekey ñi paliñ engün. Meli nag inaw‑inaw tripachi pali kiñepüle ingkawen mew, fey wüla müten müley wewün; welu traftuniekale, feymew awe ngekelay ñi wewün engün.
Femngechi paliñ kudekefuiñ iñchiñ; fey tüfa püchi paliñ pingey, palikantun ka pingey. Ka müley fücha paliñ; fey paliñkawiñ pingey. Feymew dewkey fentren pülku ka pepikangekey kulliñ iloal.
Feymew kiñe lof trawi fücha lelfün mew; pürukeyngün, fill düngulkey ñi ayekawe ñi niel engün: pifülka ka rali ka trutruka, itrokom. Feymew konuwkeyngün palialu, raneluwkeyngu kishuke konwen; dew raneluwlu konkey ñi paliñ engün.
Feychi pu domo ngen’ke paliñ mekekey ñi dewman challa korü iagel engu, ñi iyal feychi palife rupan palilu engün. Kake pu domo kiñepüle tripalwe mülekeyngün ina rewe. Fey mekekey ñi pürun engün. Ka mütrümkefi feychi pali engün. «Küpape pali, wewpe iñ pu wentru» pikey ñi ül, petu shüngüllelchi pali. Kañpüle tripalwe kake pu domo ka femngechi palilülkantulekeyngün.
Rupan palilu engün fey anümuwkey trülke mew, pontro mew rume, kishuke konwen. Kom ikeyngün ka pütukeyngün ka ngollikeyngün.
Kuyfi pu mapuche müte poyekefuy feychi paliñ. Kiñeke nag re paliñ mew trürümkey ñi düngu engün. «Iñchiñ tüfachi düngu “feleay” pikeiñ; eymün “felelayay” pikeymün; feymew paliaiñ; tuchi wewle fey feleay», pikeyngün.
Femngechi femuwyey kuyfi Purulon mülechi misión mew. Kiñe nag ayüngefuy ñi l’angümngeafel feychi padre Octaviano, welu kakelu «l’angümfal‑lay» pifuyngün. Feymew feychi üdepadrelu «paliaiñ» pingün; «iñchiñ “l’ayay” piaiñ, wewliyiñ». Feychi ñi paliael engün, palingün, piam; wewi padre ñi pu kellu. Femngechi montuy tüfachi padre ñi misión engu. «Ngünechen ñi adel tüfa» pikeyngün. ✸